Enpótans manje nan vi nou

Kalite oswa kantite ?

Pou anpil moun, byen manje vle di bon nan bouch yo epi vant yo byen plen. Yon bèl pate kóde ak bon jan ze, hotdog, pikliz ak aransó! Yon bèl plat diri kole ak vyann ! Yon bon ti fritay pou ki kraze yon grangou nan aswè !

Men èske manje dwe selman pou gou ak kantite ? Èske no pa ta dwe fè plis atansyon ak KALITE sa n ap konsome ak konsekans li genyen sou kó nou ?

Rapó ant kó nou ak manje

Machin pa fonksyone san gaz. Kó nou pa fonksyone san manje. Lè yon machin pran nan move gaz li mache mal. Le konsa motè a deranje e n oblije fè anpil depans nan repare machin nan. Akimile move abitid nan jan nou manje ak nan sa nou manje fè lakoz bon jan dega menm jan an tou nan kó nou e menm pi mal paske gen dega ki fet nan sistem nou nou oblije rete viv ak yo.Sak fè sa nap manje enpótan konsa?

Kèk wól manje jwe nan lavi nou ka ede’n pi byen wè enpótans pou nou vrèman veye san’ap konsome.

Sa manje fè pou nou

Kó nou bezwen enèji pou’l fonksyone e se nan manje n’ap manje ke li jwenn li. Reyaksyon chimik nan kó nou pèmèt ke oksijèn nou respire a ak manje n’ap konsome a transfóme an enèji pou nouri selilyo e pèmèt yo fonksyone nòmalman. Byen manje ka pèmèt nou byen grandi, fè zo nou djanm, fè san nou sikile byen, aji sou kapasite aprann nou,fè timoun nou yo jwenn tout sa yo bezwen nan lèt nou (si nou nouris),li ede kó nou konbat mikrób e kwape plizyè maladi.

Change-the-Quality-of-Your-Food-Before-You-Change-the-QuantityKèk move konsekans mal manje

Mal manje fè kó w pa byen, ou pa viv byen, po w pa bel jan w ta vlel la, cheve w pa vini jan w ta renmenl lan, ou respire mal, sistèm ou mal fonksyone. Apre plizyè ane, sa lakoz sistèm kó a kómanse degrade an plis de laj k’ap monte, lè konsa kó a kómanse pa ka goumen menm jan an ak viris, ni dijere menmjan’l te konn fèavan. Nan maladi ki pi kouran nou ka site ki gen relasyon ak sa nou konsome pandan plizyè lane, gen anemi, obezite, kwatchókó, osteyopowoz, pwoblèm nan kè, kansè fwa ak kansè pankrea, problèm tansyon ak sik, elatriye.

Ou ka amelyore sa

Pouvwa pou w amelyore jan w manje, pou w veye kalite sa w ap manje a nan men OU ! Aprann konnen kó w, konnen kisa li bezwen pou l byen fonksyone, kisa ki pa bon pou ou oswa ki ka menase sante w si w konsome l. Sa yon moun ki soufri anemi plis bezwen nan manjel pa fóseman sa yon moun ki gen pwoblem po bezwen. Metabolis tout moun pa menm. Chak moun se yon moun inik, kidonk chak moun dwe veye sou jan l ap manje pa rapó ak sitiyasyon pa li.

Ann Wigmore, yon gran save nan domèn manje ak lasante te di : Manje w ap manje ka medikaman ki pi efikas pou kó w oswa pi gwo pwazon an pou li. Chak tan w pral foure yon bagay nan bouch ou, pa bliye !Desizyon sou KALITE manje wap manje a se nan men w li ye.

Kilè yon manje bon pou kó nou? Koman nou kapab fè pi bon chwa nan sa nap manje ?

Rete branche….

Yves Marcelin Borno

AFRO FIT – Yon nouvo ribrik

Nan pale ak Christelle yon bon zanmi’m ki t’ap etidye avèk mwen nan inivèsite, li ap dekri’m jan lavi’l chanje depi lè li kómanse jere jan l’ap manje. Avan li te toujou strese, li pat alèz ak kó’l e sa te toujou fèl santi’l deprime anpil. Depi lè li chanje jan li manje, li vin gen pi bon sante, cheve’l pi bel, li malad mwens e konfyans nan tèt li vrèman ogmante.

you-are-what-you-eat

Sa konfime pawól ke anpil nan nou konn tande : Ou se sa’w manje.Èske’w ou konnen tout sa ki nan manje ke w’ap mete nan bouch ou? Èske sa’w manje chak jou yo bon pou sante’w? Kilè on moun byen manje? Ki enpótans byen manje ka genyen sou lavi nou ? Kisa ki on rejim alimantè e kiyès ki gen enterè suiv li? Èske nou konn konbyen maladi nou ka evite tèt nou lè n’ap granmoun si nou bay tèt bon abitid nan fason n’ap manje depi nan jenès nou? Èske nou oblije fè egzèsis fizik?

Healthy-Food

Si’w wè ke’w gen on repons klè sou kesyon sa yo, nou felisite’w e n’ap envite’w suiv nou pou’n k anrichi eksperyans ak konesans nou plis. Si’w pat janm reflechi a sa, n’ap konseye’w rete konekte ak AfroFit pou’w ka pran enfòmasyon sou kijan ou ka viv pi byen nan jan’w ap amelyore manje’w, nan fè egzèsis fizik epi tèt ou lót abitid ki pèmèt li fonksyone pi byen.

Nan menm optik ak cheve natirèl ou bèl la, Afro Alice panse ke pou’w santi’w byen nan po’w fók ou an sante e pou’w asire sa youn nan eleman ki pou byen jere se kijan ak kisa n’ap manje, kijan nou trete kó nou etc. Pandan n’ap swete nou yon bón ane 2015, n’ap di nou byenvini nan AfroFit kote w’ap ka jwenn tout enfómasyon ak konsèy k’ap ede’w viv pi byen, santi’w byen nan po’w e rete natrèlman pi bèl.

Yves Marcelin Borno